Aquí e Agora

Dime que querías ser

2011-12-19T23:21:00.004+01:00

Aos profes do Xograr:

Como probablemente saberedes, moitos dos membros de AeA atopámonos nun momento da nosa vida no que temos que tomar importantes decisións sobre o futuro. Rematamos o instituto e tócanos escoller un camiño entre os múltiples que se nos presentan, situación especialmente traumática para os que temos a sorte/desgraza de ser multivocacionais.

Por suposto non somos os primeiros (nin os últimos) en pasar por isto. A vós, aos profesores, tamén vos tocou, e de seguro experimentastes sensacións similares ás nosas.

Desas sensacións queremos que faledes na nova entrega do Dime que, esa sección da revista na que os profesores repasan os seus anos de acne.

Se queres participar, só tes que escribir un pequeno texto (medio folio estaría ben) centrado principalmente nos seguintes apartados:

• Vocacións da infancia e da adolescencia.

• Motivos polos que descartastes algunhas das vocacións e vos decantastes por outras.

• Medo a escoller mal.

• Que opinaría o voso “eu” adolescente da vosa profesión actual.

Despois, fáinolo chegar entregándollo a algún dos membros da revista ou enviándoo a revistaaquieagora@gmail.com

A recompensa é un agradecemento sincero na última páxina de Aquí e Agora 12.

Taboleiro 2 . 0

2011-12-11T00:12:00.001+01:00

Pois iso, mandade as vosas mensaxes para o taboleiro da revista e mandainos pronto porfa!

Seccións AeA12

2011-10-27T12:00:00.002+02:00

Esta é a lista de seccións fixas de Aquí e Agora. Se estás moi interesada/o en facer unha en concreto, fáinolo saber polo medio que queiras (e-mail, conversa ordinaria, comentario no blog...) aínda que xa estea asignada.

-Letras Galegas 2012 Asiganada!
-Deportes Asiganada!
-Cine Asingnada!
-Videoxogos Asiganada!
-Música
-Libros Asiganada!
-Taboleiro Asiganada!
-Entrevista a un autor/a Asiganada!
-Entrevista a un profe Asiganada!
-Queixas ao mundo
-Pasatempos Asiganada!
-Álbum de fotos Asiganada!
-Humor

Segunda reunión do ano

2011-10-19T21:26:00.000+02:00

AeA12 comeza o seu camiño

2011-09-29T17:56:00.000+02:00

Hoxe ía ser a primeira reunión do equipo de Aquí e Agora no curso 2011-2012. Por motivos alleos á nosa vontade non puido ser, así que será mañá. A hora e o lugar son os de sempre: sala de xuntas ás 11:15. Non faltedes!

Presentación do nº 11

2011-06-21T20:26:00.002+02:00

Un mes despois da súa saída, Aquí e Agora 11 por fin vai ter a súa presentación. Coma sempre será no salón de actos e durante ela contaremos un pouco como se fixo. Comezaremos ás 10:25 e teremos rematado á hora do recreo. Todos os participantes teñen dereito a asistir e a unha pegatina que os identifique como tales.

As xograsolucións

2011-05-25T07:54:00.004+02:00

As solucións dos pasatempos xograrinos de AeA11.

As sete diferenzas:

A sopa de letras (nomes que debestes atopar):

Ruth
Paco
Sonia
Chus
Diego
Fernando
Edelmira

O encrucillado:

1-Bolboreta

1-Berce

2-Fiestra

3-Bágoa

4-Larpeirada

5-Chuvia

6-Pomba

7-Quérote

8-Burbulla

9-Beleza

O rosco:

A: Aquí.

B: Bomba

C: Chachi

D: Doce

E: E

F: Fila

G: Galego

H: Hiato

I: Ilusión

L: Lucense

M: Mestre

N: Noite

Ñ: Bañador

O: Ovella

P: Pouco

Q: Queixo

R: Agora

S: Sol

T: Tapar

U: Último

V: Vampiro

X: Ximnasia

Z: Zapato

O noso entroido

2011-05-24T22:46:00.005+02:00

Por un despiste no proceso de maquetación, parte da reportaxe de Ruth Fernández sobre o entroido en Galicia aparece descolocada en Aquí e Agora 11 e non se pode ler. Foi un fallo noso polo que pedimos desculpas aos lectores e lectoras e á autora.

A modo de enmenda pegamos aquí o texto orixinal de Ruth:

O noso Entroido

Este ano decidín pasar o Entroido mergullada de cheo no triángulo máxico ourensán: de Verín a Laza e de aquí a Xinzo de Limia, coas súas características Pantallas. Iso si, achegándome a Viana do Bolo para ver de preto os Boteiros, ata o de agora descoñecidos para min, uns personaxes típicos do Entroido do lugar que comparten cos de Vilariño de Conso o seu aspecto, malia as diferenzas que atopan os oriúndos de cada lugar. Vivino intensamente… gozando da gastronomía típica do Entroido dende a véspera ao Xoves de Comadres, onde Verín se vestiu de gala para dar a entrada aos días grandes destas festas. Cos Cigarróns baixando do Castelo de Monterrei fixen un agasallo á miña vista, xa que sinto verdadeira paixón por esta singular máscara do Entroido ourensán, e entre Cigarróns e Peliqueiros desfrutei da festa do Entroido máis ancestral. Destes últimos dise que datan do século XVI, cando os Condes de Monterrei, exercendo o seu poder na comarca, facíanos funcionar como cobradores de tributos. Con 25 quilos ao lombo, o Cigarrón sae polas rúas de Verín facendo notar o seu orgullo a todos os que se achegan para contemplar un dos entroidos máis sonados da nosa xeografía, sen dúbida. Do Domingo Fareleiro ou Borrallento ao Martes de Entroido, pasando polo Xoves de Compadres, o Domingo Corredoiro ou Oleico, o Xoves de Comadres e o propio Domingo de Entroido. Son días de festa asegurada!

Como anticipei, no Carnaval concedemos especial atención á gastronomía. En ningunha mesa faltan a cachucha, as unllas de porco, os chourizos e o botelo ou as androias. Grelos, orella e lacón. O porco é o produto estrela nesas datas. O Entroido é sinónimo de festa rachada en moitos puntos de Galicia, sempre coa axuda de ceas ou xantares "hipercalóricos", abusando da comida ata chegar a un postre ao que ninguén pode resistirse: as filloas con mel, as torrixas e as orellas de Entroido poñen a guinda á festa pagá.

Don Carnal preside esta celebración ata o Mércores de Cinsa, deixando paso, tras o tradicional enterro da Sardiña (a queima do papagaio Ravachol en Pontevedra, que vivín algún ano), ao período da Coresma coa Semana Santa… Sentindo dentro de nós a melancolía que produce o final dunha festa, lembramos a cantiga do Entroido: "Adiós martes de entroido,/ adiós, meu amiguiño,/hasta Domingo de Pascua/ non comerei máis touciño".

No famoso libro de Juan Ruiz, Arcipreste de Hita, a Coresma vese como a personificación do xaxún, da abstinencia, en definitiva, da confesión, mentres que don Carnal no Libro de buen amor remite ao desexo e á gula, xunto a todo o que entendemos polos pecados da carne. Lembremos a seguinte cita: “a ti, Carnal goloso, que nunca te has de hartar/ el Ayuno en mi nombre, te va a desafiar”. Tras a loita, don Carnal recibe a penitencia de que “por tanto pecado/ comiera cada día un manjar señalado/ y nada más comiese, para ser perdonado”. Eses manxares eran garavanzos con aceite, migas, espinacas, lentellas con sal, pan e auga, fabas... alimentos que nada tiñan que ver cos que tanto gozaba don Carnal na obra medieval, caracterizado coma goloso, soberbio, sañudo e poderoso. A loita entre os dous exércitos fai que saian á luz todo tipo de carnes, incluída a caza, fronte aos peixes e as verduras que permite a Igrexa, institución parodiada por prácticas como a venda de bulas.

Máis alá do triángulo máxico ourensán están as máscaras dos Volantes de Chantada, os Xenerais en Boqueixón, A Estrada e Silleda. Pero non quero esquecerme de máscaras acabadas de descubrir nas miñas pescudas sobre o Entroido: a "Mázcara" de Manzaneda, os Felos de Maceda, os Troteiros de Bande ou as Teixugueiras de Cartelle. E tampouco me olvido, como non podía ser doutro xeito, do Oso de Salcedo, na provincia de Lugo, nativo da Pobra de Brollón, que sae á rúa acompañado polos seus criados para asustar os viandantes.

En canto ás peculiaridades de cada zona, convén sinalar os rasgos máis representativos das máscaras ou traxes típicos de lugares coma Xinxo de Limia, Verín ou Laza. No Carnaval de Xinzo o traxe típico son as Pantallas, composto de camisa e calzón brancos, capa vermella ou negra, pano case sempre roxo, polainas negras e zapatos da mesma cor. Non poden faltar nin a faixa vermella cinguida nin as campaíñas, así como as dúas vexigas de vaca secas e infladas que levan na man e que contribúen a facer tan característico ruído. Nese concello o Entroido é o máis longo, tendo xa nos domingos Fareleiro, Oleiro e Corredoiro xornadas de auténtica troula. A Pantalla, símbolo do Carnaval na vila, ten unha peculiar función: vixiar que ninguén ande pola rúa sen disfraz. Ir sen el supón ademais ter que convidar a unha ronda de viño, xa que perseguen e conducen en brazos ás súas vítimas ata o bar máis próximo para pagar uns viños ao grupo de Pantallas, que se caracterizan ademais por emitir, diante dos forasteiros e das mulleres, un son xordo que semella o dun animal que busca meter medo, mentres saltan e rodean a xente. A pantalla (carauta), que lle dá o nome a todo o conxunto, está elaborada con cartón, feltro, fariña, auga, papel de xornal e pintura. Ten trazos de diaño, con cornos e cara de sorna, adornando a parte de arriba con motivos animais ou astrais.

Pola súa parte, en Verín están os Cigarróns, para os que a orixe se sitúa nos antigos cobradores de impostos do Conde de Monterrei, que baixaban ao val facendo sonar as "chocas" para meterlle medo á xente, hoxe portando un látego co que baten aos viandantes. O 17 de xaneiro, día de S. Antón, aparecen por vez primeira. Pero é o domingo de Entroido o gran día, cando ten lugar o desfile de carrozas e comparsas, que este ano foi marabilloso. O traxe de Cigarrón consta dunha carauta de madeira pintada de xeito que se resaltan as cellas, meixelas, o bigote, un sorriso cínico e a dentadura. Na parte de follalata van pintados motivos animais e vexetais (o lobo e a lúa son frecuentes) e pola parte de atrás leva unha pelica, de pel natural ou sintética. Dende o máis alto da mitra tamén colga a crin de cabalo característica. Como roupa leva unha camisa branca e unha gravata vermella. Sobre a camisa vai unha chaquetiña curta de seda con ornamentos dourados, que ata con lazos de cores. Un pano, prendido con broches femininos remata a parte de arriba do traxe. Na cintura leva unha faixa de varias voltas e por riba dela o cinto de coiro do que penduran seis grandes chocas de cobre. Cubrindo as pernas levan un calzón curto con trenzados de lá branca e de cor, frecos e borlas, nas que predominan as cores vermellas e verdes. Viste medias brancas que se suxeitan con ligas e na man leva unha zamarra ou látego do que pende unha badana de pel e do que hai que fuxir cando os vemos avanzar cara nós.

Laza é outro extremo do triángulo do Entroido, comezando o ritual o primeiro día do ano a partir das doce da noite, cando os mozos que logo irán de peliqueiros fan soar as súas chocas. Aos folións, entendidos como procesións nocturnas con misión de desembruxo, sucédenlle o sábado as cabritadas, cantando versos coma os que seguen: "Catro cousas hai en Laza/ non as hai en toda a terra/ peliqueiros, maragatos/ as formigas e a morena". É o domingo cando se estrea o traxe de Peliqueiro, se reparte bica e licores típicos. En Laza pódense vivir rituais tan primitivos como a farrapada, a chamada xitanada dos burros, o día da morena e das formigas. Deste xeito, a praza da Picota atéigase dunha mestura de auga, de terra e de cinsa con formigas.

Cóntovos algo máis: na Gudiña, no CPI Laureano Prieto, este ano tivemos unha visita moi especial no Centro: un Cigarrón (baixo o que se agochaba unha profesora substituta que estivo no centro ata xaneiro). Os rapaces quedaron abraiados cando escoitaron sonar as chocas, cando viron que a máscara do Entroido de Verín pisaba as aulas. Tamén se celebraron o xoves de compadres e o xoves de comadres. Houbo fariñada e folión, desfile para os máis pequenos e chocolate para todos.

Ruth Fernández Fernández

(Profesora de Lingua Castelá e Literatura)

Aquí e Agora 11

2011-05-19T18:35:00.006+02:00

Xa podedes ler o undécimo número de Aquí e Agora tanto en papel (biblioteca do Xograr, corredores, sala de profesores...) como en dixital.

O mes que vén presentarémolo no salón de actos. Anunciaremos a data concreta proximamente.

Xa temos revista!

2011-05-08T22:42:00.004+02:00

Acabamos de gardar o arquivo en .pdf que será Aquí e Agora 11. Está feito, rematamos! A semana que vén poderedes lelo. Mentres tanto, aquí tedes a portada.

Grazas a tod@s @s que colaborastes!

Queda pouco

2011-04-16T13:12:00.004+02:00

Moi, moi pouco para que poidades ter nas vosas mans (ou nos vosos ordenadores) o número ONCE de Aquí e Agora.

Máis queixas, máis entrevistas, ¡máis Xograr!

Todo iso e moito máis, na semana do 20 de MAIO.

2011-03-23T16:38:00.000+01:00

ATENCIÓN

2011-03-19T16:44:00.005+01:00

A data límite de entrega de contidos para o número 11 de Aquí e Agora é o 22 de abril de 2.011. Os traballos que recibamos máis aló dese día dificilmente poderán ser incluidos na revista, xa que queremos que saia en maio e hai que maquetar e imprimir. Sede responsables e non agardades ao último día!

Primeira xuntanza do ano

2011-02-04T20:42:00.001+01:00

Este xoves día 10 á hora de sempre no sitio de sempre.

Dous vídeos

2010-12-28T22:31:00.006+01:00

Pepa recoméndanos dous fantásticos vídeos para amenizar as vacacións.

Un curioso documental...

...e unha historia en tres minutos.

Non deixedes de velos!

Dime que suspendías

2010-12-17T11:15:00.031+01:00

Cambiamos o "Dime que escoitabas" polo "Dime que suspendías". Profes que queirades participar, aquí tedes as instruccións.

Constrúe un pequeno texto sobre os teus anos de instituto abordando os seguintes puntos:

1. Materias odiadas.

2. Materias favoritas.

3. Materias que suspendías ou case.

4. Materias nas que arrasabas con relativamente pouco esforzo.

Podes engadir calquera outra cousa relacionada co tema e que sexa interesante. As respostas envíaas por e-mail a revistaaquieagora@gmail.com ou entrégallas en man a algún redactor/a. O prazo remata o 10 de xaneiro. A participación prémiase cun agradecemento sincero en AeA 11 e cun marmolubio de boa calidade.

2010-12-04T13:52:00.000+01:00

2010-11-11T21:07:00.002+01:00

Contidos a repartir

2010-10-13T17:04:00.008+02:00

Estas son as seccións fixas que temos que repartir:

-Letras Galegas 2011. Asignada!

-Deportes. Asignada!

-Cine. Asignada!

-Videoxogos. Asignada!

-Música. Asignada!

-Libros. Asignada!

-Taboleiro. Asignada!

-Entrevista a un autor/a. Asignada!

-Entrevista a un/unha profe. Asignada!

-Queixas ao mundo. Asignada!

-Pasatempos xograrinos. Asignada!

-Álbum de fotos. O que precisamos para esta sección é un coordinador ou coordinadora que se encargue de recoller fotos e mini-crónicas das excurisóns máis significativas. Asignada!

-Humor. Asignada!

Facédenos saber cal (ou cales) queredes, aínda que nun principio estea xa asignada, e recordade que podedes traballar en grupo.

Se vos apetece aparecer na sección de equipo, mandádenos un textiño e unha foto do estilo dos do exemplo. Por suposto non é obrigatorio.

Primeira reunión do ano

2010-10-07T20:18:00.003+02:00

Empezamos co Aquí e Agora nº11.

O mércores 13 na sala de xuntas, durante o recreo

terá lugar a primeira reunión do equipo.

Un ano máis, recordarvos que calquer alumno/a pode entrar a formar parte da redacción de AeA, de 1º de ESO a 2º de BAC, altos, baixos, críticos ou bromistas: só pedimos ideas, críticas e ganas de seguir mellorando a revista.

Por ser a primeira reunión, probablemente durará todo o recreo e sentimos roubarvos o voso tempo de descanso, pero recordade que todos facemos o mesmo esforzo e a todos nos pagan o mesmo. Prometemos que intentaremos facer só as reunións xustas e necesarias e que moi poucas durarán todo o recreo ^^.

Agardámosvos!

Wynton Marsalis

2010-09-25T15:31:00.005+02:00

Para facer máis fácil a volta ás clases, a profe de Galego, Pepa, mándanos este vídeos do trompetista Wyton Marsalis:

"¿Tes notas agudas?

¿E tes notas graves?

¿E notas rápidas?

¿E notas lentas?

¿Tes notas que sexan doces? (??)

¿E notas que se repitan?

¿Notas que choran?

¿E notas que voen? (Moscardón, de Korsakov)

¿Algunhas notas .....?

¿Algún futuro grupo? (??)

¡Si! Pero rápido ou lento, agudo ou grave, son as notas as que fan que a música empece.

¡Gracias, Pepa!

Novo curso

2010-09-19T20:07:00.001+02:00

E novo blog.

Non fai falta ser moi observador para decatarse de que está moi, moi cambiado.

-A primeira noticia é unha que levamos moitísimo tempo querendo anunciar: xa están online TODAS AS REVISTAS. Dende xa podedes ir á pestaña de "le as revistas online" e lelas do número 1 ao 10. Ademáis, podedes ler a versión en .pdf da 9 e a 10.

-En "Que é isto?", o coordinador fainos unha pequena introducción sobre o blog.

-Posto que tivo moi boa acollida, decidimos subir o documental que Sandra e María fixeron para a presentación do décimo número, "Aquí e Agora: e xa van dez!". Inclúe información adicional sobre onde se rodou, quen participou...

-Temos a maiores a sección de "O Equipo" que se irá enchendo a medida que vaia avanzando o ano.

-Por último, na páxina de "Contacto" podédesnos mandar preguntas, suxerencias, críticas... e nós contestaremos en canto poidamos.

Co novo curso comezamos tamén a traballar na nova revista.

Toca empezar a pensar no contido, na portada... e nos novos fichaxes.

Se xa es veterano, esperámoste na primeira reunión do ano. E se es novato, colle asento e ¡benvido!

Coma sempre, as reunións serán durante a hora do recreo. Para saber o día, soamente tedes que estar atentos aos carteis que o anuncian ou preguntarlle Xesús.

Recordarvos tamén que estamos esperando as vosas suxerencias e opinións. Todo AQUÍ.

Benvidos ao novo blog e curso.

¡Boa volta ás clases!

A BSO do documental

2010-07-07T15:35:00.000+02:00

Como curiosidade aquí vos deixo as tres cancións que utilizamos como banda sonora no documental.

1. Petición, de Cohete. Só soa o corte do minuto 1:40 ao 2:00.

2. My family's role in the world revolution, de Beirut.

3. M79, de Vampire Weekend.

Solucións nº10

2010-07-03T00:00:00.001+02:00

Máis vale tarde ca nunca...

Sopa de letras:

O prezo total é de 3'20 €.

Labirinto:

Encrucillado:

1. Cantalapiedra

2. 16

3. Darwin

4. Fariña

5. Londres

6. Amaral

7. Courel

Sobre a portada:

O da foto é Uxío Novoneyra, hai dez lacasitos, o grupo de CD é Mecano e a profe que o menciona é Sonia.

Para as horas mortas:

1. Ningún. O da arca é Noé.

2. Tres.

3. Ten razón. Con escribir un "s" antes do IX (SIX) abonda.

4. Como o aforcado non pode saber que día será aforcado, a execución non pode ter lugar o último día xa que entón saberíao. Seguindo esta lóxica tampouco pode ser aforcado o penúltimo día, nin o antepenúltimo, nin nigún dos anteriores.

6. A muller mide 1'35 m.

A presentación

2010-06-23T22:11:00.000+02:00

Onte por fin tivo lugar o acto de presentación do décimo AeA. Foi un pouco diferente da dos anos anteriores porque, ademais de dar o habitual discursiño, estreamos o "documental" Aquí e Agora: e xa van 10!.

Non é por fachendear, pero foi un éxito de crítica e público e conseguiu un número de bocexos por minuto inferior á media habitual do salón de actos. Ademais, debido á gran demanda popular, estamos barallando subir o documental ao blog para que poidades velo os que o perdestes. Proximamente teredes noticias ao respecto.

Nada máis por hoxe, para mañá as solucións aos pasatempos!

Número 10 en dixital

2010-05-29T12:21:00.001+02:00

E xa temos a terceira revista en dixital!

Dende agora mesmo está a disposición de todos vós tanto aquí, como na web do instituto.

Se mirades na columna da dereita, atoparedes o nº10. Clicade nel para vela.

¡Ide a botarlle unha ollada e contádenos que vos parece!

Xa o prometemos máis veces... pero, cremos que para este verán conseguiremos ter as que faltan en dixital.

¡Cruzamos os dedos!

Polo de agora... ¡abur!

Pdta.: gracias un ano máis a Nacho por sacar un momentiño para subila.

Por fin!

2010-05-26T15:27:00.000+02:00

Xa está aquí!

Despois de moitos meses de traballo o décimo número de Aquí e Agora ve a luz por fin.

Esperamos que vos guste.

Axiña a versión dixital.

Entre fogóns

2010-04-18T17:26:00.000+02:00

O décimo número de Aquí e Agora xa está na cazola. Máis da metade da revista xa está preparada e esperamos ter a outra metade axiña. Se todo vai ben, dentro dun mes poderemos servívola impresa e en dixital.

Aproveitamos tamén para anunciar que este ano, con iso do décimo aniversario, estamos que tiramos a casa pola ventá e imos imprimir dez revistas a toda cor.

Para os profes do Xograr:

2010-02-03T17:20:00.001+01:00

Buscamos docentes intrépidos que se atrevan a confesarnos os seus gustos musicais adolescentes (entendendo a adolescencia dos 13 aos 19) para unha nova sección da revista. Se te atreves o único que tés que facer é enchernos estes apartados:

1. Grupos e estilos, 2. A través de que (radio, colegas...), 3. Canción/s favorita/s oi máis significativas, 4. Hoxe (que escoitas agora, se seguiches na mesma estela, se pasas da música, se pensas que é peor/mellor agora...), 5. De camiño (que soa no coche cando vas ou volves ao instituto. Se pertences ao grupo de residentes en Sarria e vés a pé non tés que encher este apartado, obviamente).

As respostas a revistaaquieagora[arroba]gmail.com. Procura non sobrepasar as 300 palabras.

Se temes que che mandemos un troiano tamén podes buscarnos e dicírnolas persoalmente.

Aquí e Agora 9 en dixital

2009-06-16T20:30:00.000+02:00

Xa a temos aquí!

Na columna da dereita xa está dispoñible para todos o Aquí e Agora 9 e vou poñer un enlace ó final desta entrada.

E xa temos dúas revista en dixital... guau ¡¡e para o ano próximo o 10º aniversario!!

Soamente nos queda dar outra vez as grazas a Nacho por subirnos a revista.

¡Ah! E agradézome a min mesma pasala a .pdf jeje

Se clicades na imaxe xa vos saen algúns dos cambios deste ano, así que non me vou andar repetindo.

Ea ¡¡disfrutádea!!

AQUÍ E AGORA nº9

Xa está aquí

2009-06-01T19:52:00.000+02:00

Por fin! A revista xa está na rúa. Se vos movedes polo Xograr xa podedes ver o nº 9 do Aquí e Agora. Hai un exemplar por aula, uns cantos na sala de profes, outro par na biblioteca, etc, etc, etc... Esperamos que vos guste e agardamos impacientes as vosas críticas (malas ou boas, claro). Nós pola nosa parte temos que dicir que non estamos de todo content@s co resultado. Debido a un erro na marxinación, hai tres títulos de páxina situados ó final da páxina anterior. De quen é a culpa? Eu diría que nosa por pasalo en Word en lugar de en .pdf a pesares de que sabiamos que isto podía acontecer e tamén da imprenta, porque non facía falta fixarse moito para ver que había un erro corrixible (que non tiñan obriga de corrixir, admito tamén). En fin, tampouco hai que darlle moita importancia. Simplemente queriamos explicalo.

Temén teño que informarvos de que, tan pronto como rematen os días de exames que se nos veñen enriba, subiremos a revista en formato .pdf, en cor, con todos os seus contidos para que poidades vela, descargala ou incluso imprimila.

O debuxo de arriba é o orixinal, aínda sen as letras. Non puiden escanear o resultado final.

Saúdos e ata pronto!

O chat

2009-05-15T20:04:00.000+02:00

Desde hoxe día 15-5-09 queda aberto o chat do Aquí e Agora, onde os alumnos do Xograr poderán falar entre eles.

Aínda que hai unha soa e única condición para comunicarse neste chat:

-Non se pode isultar nin faltar o respecto ós demáis usuarios conectados.

Esperamos que o chat sexa do voso agrado e desexamos que nos visitedes moito.

**O CHAT ESTÁ DESACTIVADO**

O nº 9 xa está no forno

2009-05-02T15:42:00.000+02:00

Pouco queda xa para que o número 9 da revista sexa publicado, estou aproveitando estas minivacacións para maquetar todo o que está chegando ao correo electrónico.

Todos aqueles interesados en publicar algo, por favor, que o manden antes do luns 4 a esta dirección:

revistaaquieagora@gmail.com

¡¡Xa queda pouco!!

María

Primeira reunión

2008-10-17T18:13:00.000+02:00

PRIMEIRA REUNIÓN DA REDACCIÓN DA REVISTA DESTE ANO:

MARTES 28 DE OUTUBRO

NA SALA DE XUNTAS DURANTE O RECREO

>SE QUERES PARTICIPAR ESTE ANO NA REVISTA LEMBRA QUE SOAMENTE TÉS QUE ASISTIR ÁS REUNIÓNS

Aquí e Agora 08 en dixital

2008-10-13T17:29:00.000+02:00

¡¡POR FIN!!

Despois de mil quebradeiros de cabeza sobre como colgala, xa está aquí.

A revista do centro xa está dispoñible en dixital para que calquera a poida ver en formato de power point.

Para poder vela podedes clicar aquí ou no enlace que hai á dereita.

Se a revista vos abre en formato de power point en lugar de nunha ventá de google

directamente, só tedes que ir a parte superior, darlle a "Presentación", despois a "Ver presentación" e ir premendo no botón para que as páxinas pasen.

Moitas grazas a Nacho por axudarnos con todo este tinglado, pois el foi o que nos colgou a revista, e non mandarnos a dar un paseiño.

Seguirémosvos contando as novas que surxan.

Non damos máis a lata ¡¡a desfrutar da revista!!

¡¡Un saúdo!!

Pdta.: Tede en conta que as imaxes da revista son escaneos, así que non se lles pode pedir moito máis, para o ano esperamos ter as cousas directamente de word.

Curso novo...

2008-10-02T16:29:00.001+02:00

...e blog novo.

¡¡Ola!!

¡¡Benvidos todos e todas ó blog da revista do Aquí e Agora!!

O blog foi creado principalmente para poder poñer nel a revista do centro en dixital, o que todavía está en construcción...

Pero nel tamén iremos poñendo todas as novidades que surxan.

Recordade que para formar parte da revista soamente tedes que asistir ás reunións que se convoquen e, claro está, formar parte do alumnado do Xograr.

Esperamos que sexa do voso agrado e que nos visitedes moito :p

¡Un saúdo!